Patrimonio cultural galego

De Ría a Ría

Partida: Noia
Destino: Centro Arqueolóxico do Barbanza (Boiro)
Distancia aproximada: 40 km.

As Rías Baixas conforman unha zona moi poboada desde os primeiros momentos da nosa historia. Un clima suave, terras fértiles, praias e fondeadoiros tranquilos e un bosque abundante proporcionaron un hábitat que propiciou o asentamento das xentes tal e como amosan a infinidade de xacementos arqueolóxicos que se remontan a tempos ben antigos.

Como resultado, estas rías posúen un riquísimo legado patrimonial, non sempre ben coñecido, caracterizado pola súa diversidade. Ás veces, nun pequeno percorrido é doado identificar testemuños pertencentes a diversos períodos históricos ou atopar monumentos de singular valor.

O propósito desta ruta é, precisamente, a descuberta dunha pequena parte dese legado. En pouca distancia é posible coñecer e recoñecer bens patrimoniais de moi diversa procedencia no referente a estilos e cronoloxías; cada un deles posúe un gran valor a título individual e en conxunto reflicten as diferentes caras da nosa historia.

Comeza a ruta en Noia, que conserva un casco histórico senlleiro e moi representativo do que foron as vilas mariñeiras e comerciais até hai pouco tempo. Ao carón do antigo recinto amurallado está Santa María A Nova, igrexa e cemiterio, que acolle a colección de laudas gremiais históricas máis importantes do mundo. Un pequeno desvío até as ribeiras do Tambre permite ao viaxeiro visitar nun emprazamento singular coroado por unha arquitectura única: o edificio deseñado por Antonio Palacios para acoller a central eléctrica; nas proximidades sitúase a central Tambre II con ese aire de rabiosa modernidade e formas rectas que hoxe tendemos a desprezar e que tamén temos que aprender a valorar.

Os montes do Barbanza constitúen un singular espazo natural que acolle aldeas que miran ao mar e un importantísimo patrimonio arqueolóxico. Deste xeito, a Cova da Moura ou Dolmen de Argalo representa unha oportunidade única para achegármonos ao mundo dos megálitos en Galicia. Xa rematando o camiño, o Centro Arqueolóxico do Barbanza e os adxacentes Castros de Neixón ofrecerán ao viaxeiro datos e experiencias que darán fe da longa historia destas terras e da súa peculiaridade.

Coordenadas xeográficas para outros formatos (latitude/lonxitude):

• Saída Noia (estacionamento): 42.78471979ºN 8.89099374ºW
• Central Hidroeléctrica do Tambre I: 42.83563741ºN 8.84911773ºW
• Central Hidroeléctrica do Tambre II: 42.83303256ºN 8.84615311ºW
• Dolmen de Argalo: 42.76848729ºN 8.89110304ºW
• Boiro: 42.64507997ºN 8.89156462ºW
• Castros de Neixón: 42.64507997ºN 8.89156462ºW

Extras:

• Castro de Baroña: 42.69405346ºN 9.02499299ºW
• A Igrexa, Oleiros: 42.60296333ºN 9.00600889ºW
• Dolmen de Axeitos: 42.59983117ºN 9.01765004ºW

• 

  Castro de Baroña

  A península coñecida como Punta do Castro, na entrada sur da ría de Muros e Noia, acolle nos seus 22,6 quilómetros cadrados un pequeno xacemento castrexo marcado pola súa peculiar orografía marítima e as vistas panorámicas sobre Fisterra e Corrubedo.
• 

  Dolmen de Axeitos

  Situado no lugar de Axeitos da parroquia de Oleiros, municipio de Ribeira, o dolmen de Axeitos ou "Pedra do Mouro" é un dos monumentos megalíticos máis admirados dentro e fóra de Galiza. Data do terceiro milenio a.C. e conforma un dos vestixios megalíticos de maior relevancia patrimonial do país.