Patrimonio cultural galego

Arredor de San Simón

Partida: Parque Zoolóxico da Madroa (Vigo)
Chegada: Arcade
Distancia aproximada: 38 km

Sedia-m'eu na ermida de San Simón/ e cercaron-mi as ondas, que grandes son. Así comeza unha das obras senlleiras da nosa literatura, a cantiga do trobador Mendiño que conta a ansiedade da moza que axexa ao seu amigo. Cercada na Illa, á súa espera ou a de alguén que a rescate, a terra que tiña enfronte era, precisamente, a que esta ruta propón. As abas dos montes de Domaio (na cara Norte) e Trasmañó (na sur) enmarcan o fondo da Ría de Vigo e o separan das augas máis abertas que están protexidas polas Illas Cíes.

É un itinerario por pobos e vilas que mudaron moito desde aqueles anos pero que conservan moi vivos non só os testemuños daquel tempo e mesmo outros anteriores senón tamén a memoria heroica e lendaria de acontecementos cruciais da nosa historia como as batallas de Rande e os seus galeóns afundidos nestas augas estreitas, e a de Ponte Sampaio coa coraxe de quen foi quen de vencer ao exército francés. Tamén a de feitos máis recentes, dolorosos pola súa proximidade e inxustiza, como os sucedidos na Illa de San Simón durante os longos anos da represión franquista.

A ruta percorre os concellos de Vigo, Redondela e Soutomaior, case sen perder de vista o mar, fonte de vida e prosperidade antes e agora. Comeza nos cumios do Vixiador e Penide, onde os nosos primeiros arquitectos deixaron esas maxestosas e abraiantes construcións, que hoxe chamamos túmulos megalíticos, e que antes acollían a aquela veciñanza exótica que eran "os mouros". Baixamos cara o mar por estradas estreitas con panorámicas inesquecibles, para chegar a Redondela, antigo porto pesqueiro e comercial hoxe dinámica capital municipal. Sobre nós, os viadutos que trouxeron o tren e que desafían ao paso do tempo.

Estamos nun territorio intensamente poboado e de moito movemento de persoas e mercadorías, ao que situarse no vello camiño que conectaba Pontevedra con Vigo e con Tui e Portugal. Nas marxes da ruta principal, atópanse aldeas e pobos que seguen ramais cara ao interior, aproveitando vales e cursos fluviais. O antigo castro e a ermida da Peneda sitúase nun outeiro que controla boa parte de toda a rexión; un pouco máis aló, o castelo de Soutomaior lembra outros tempos, aqueles nos que os cabaleiros desta casa eran os amos da terra.

Xa de volta, é imperativo facer homenaxe aos heroes da Independencia na Ponte Sampaio, escenario da gran batalla e unha das pontes máis antigas e transitadas do país.

Coordenadas xeográficas para outros formatos (latitude/lonxitude):

• Saída -Vigo Zoo: 42.247962ºN 8.676249ºW
• Cantina Monte Vixiador: 42.25187ºN 8.65036ºW
• Redondela: 42.28554ºN 8.608721ºW
• Ermida do Viso: 42.322778ºN 8.5906ºW
• Castelo de Soutomaior: 42.329822ºN 8.568606ºW
• Ponte Sampaio: 42.345287º N 8.606994ºW

• 

  Castelo de Soutomaior

  A pesar das numerosas transformacións e engadidos dos que foi obxecto, o castelo permite distinguir diferentes etapas de construción. Conta con torres de defensa de planta rectangular e ponte levadiza e con construcións diferentes tales como capela, sanatorio, pavillóns, hórreos, palco e lavadoiros. Ademais está rodeado de amplos e antigos xardíns.
• 

  Ponte de Ponte Sampaio

  Ponte Sampaio atópase facendo fronteira entre a parroquia de Arcade, do concello de Soutomaior, e a parroquia de Ponte Sampaio, do municipio de Pontevedra, no fondo da ría de Vigo, na desembocadura do río Verdugo. A súa historia quedou ligada á Guerra da Independencia, xa que nela se librou unha batalla no 1809 contra as tropas de Napoleón que determinou a saída de Galiza do exército francés.