Patrimonio cultural galego

Resultado da búsqueda: Ubicación

• Parque Arqueolóxico da Arte Rupestre en Campo Lameiro

O parque da arte rupestre de Campo Lameiro está concibido como un modelo integrado para a protección, investigación e xestión dos petróglifos galegos. Atópase dentro da RGPA, que é un programa creado pola Consellería de Cultura e Turismo da Xunta de Galicia coa finalidade de promover o patrimonio arqueolóxico galego. Dentro desta rede prevense crear catro parques máis, un por provincia, dedicados a outras manifestacións arqueolóxicas.

• Área Arqueolóxica de Arte Rupestre de Tourón

O centro arqueolóxico de Tourón está integrado na Rede de Patrimonio Galego e, máis concretamente, no proxecto do Parque de Arte Rupestre, a través do cal se pretende abordar a protección, investigación e difusión da arte rupestre galega. Aínda que centra a súa acción no concello de Campo Lameiro, o proxecto compleméntase con actuacións sobre outras estacións rupestres significativas, como é o caso de Tourón.

• Petróglifos de Mogor

Trátase dunha das estacións rupestres máis emblemáticas da arte rupestre galega, coñecida xa desde mediados do s. XIX. Está situada sobre a praia de Mogor e integrada por varias rochas sobre as que gravaron un considerábel número de cazoletas e de deseños xeométricos e, en menor medida, representacións de cérvidos.

• Castro de Santa Tegra

O asentamento castrexo de Santa Tegra compón un xacemento arqueolóxico cunha extensión de 700 metros en dirección norte-sur por 300 metros en sentido oeste-leste. Rodeado por unha muralla que o delimita máis do que o protexe, o conxunto recolle vivendas, almacéns e fornos que exemplifican as características esenciais dos asentamentos galaicos durante os primeiros tempos da ocupación romana da Gallaecia. Recibiu o nome de "citania" pola influencia e semellanza cos grandes castros do norte de Portugal.

• Mosteiro de Santa María de Armenteira

Sitúase o mosteiro de Armenteira no val do Salnés, dominando unha alta canada na ladeira occidental do monte Castrove. A situación do conxunto responde ao arquetipo cisterciense: val pouco accesíbel, rodeado de montañas e con leito de auga. A disposición dos edificios é tamén a habitual da orde: igrexa ao norte do conxunto, en orientación leste-oeste; pegado a ela, o claustro; e, ao seu redor, as estancias monacais.

• Catedral de Tui

Arredor de 1120 o bispo Alfonso II coloca a primeira pedra da actual catedral sobre os cimentos da antiga. Foi consagrada polo bispo Egea entre 1224 e 1225. A basílica sufriu numerosas transformacións ata o século XVII: o soportal foi rematado en 1287, a cabeceira foi modificada a finais do século XV e o claustro foi feito no século XIII e reconstruído en 1408 e 1464.

• Ponte da Ramallosa

A ponte da Ramallosa sitúase sobre o río Miñor, no tramo final á desembocadura, entre os concellos de Nigrán e Baiona. Algún historiador atribúelle unha orixe romana ao estudar as vías romanas na zona, e máis concretamente a vía XX do Itinerario de Antonino Caracalla, a denominada per loca marítima.

• Ponte de Ponte Sampaio

Ponte Sampaio atópase facendo fronteira entre a parroquia de Arcade, do concello de Soutomaior, e a parroquia de Ponte Sampaio, do municipio de Pontevedra, no fondo da ría de Vigo, na desembocadura do río Verdugo. A súa historia quedou ligada á Guerra da Independencia, xa que nela se librou unha batalla no 1809 contra as tropas de Napoleón que determinou a saída de Galiza do exército francés.