Patrimonio cultural galego

Resultado da búsqueda: Ubicación

• Catedral de Santiago de Compostela

A catedral de Santiago de Compostela é, desde hai varios séculos, un referente da Cristiandade en Occidente. Trátase dun monumento complexo e diverso, tanto interior como exteriormente. Foi consagrada no ano 1211, aínda que en posteriores épocas iránselle engadindo numerosos elementos e dependencias ou modificando os anteriores. De aí a súa famosa aparencia barroca.

• Real Colexiata de Santa María de Sar

Antigo mosteiro dos cóengos regulares de Santo Agostiño, situado na beira dereita do río Sar, en Santiago de Compostela. Fundouse no ano 1136 grazas a Diego Xelmírez. Foi a primeira comunidade agostiña de Galiza. No século XVI converteuse en colexiata e no XIX pasou a ser unha das parroquias da arquidiocese compostelá, na actualidade comparte uso parroquial co de Museo de Arte Sacra e centro escolar. Foi declarado monumento nacional en 1895.

• Igrexa de San Domingos de Bonaval

As modificacións das que foi obxecto a primitiva igrexa gótica de San Domingos de Bonaval, construída na primeira metade do século XIII, fan que na súa fábrica actual se poidan distinguir elementos góticos, barrocos e neoclásicos. O seu corpo central, dos séculos XIII e XIV, é o único exemplo que se conserva en Compostela do gótico mendicante.

• Igrexa-colexiata de Iria Flavia

Igrexa reconstruída no s. XII sobre un templo anterior destruído por Almanzor. Desta reconstrución queda tan só a portada principal de estilo gótico. O bispo Xelmírez converteuna en colexiata no século XII ata que esta foi suprimida no ano 1851 quedando reducida a parroquia. A actual igrexa data dos séculos XVI e XVII, e conserva no seu interior retablos, sarcófagos, un mausoleo e unha talla pétrea da Virxe.

• Ponte Maceira

A ponte vella sobre o río Tambre, no lugar da Ponte Maceira, no concello de Negreira (un dos tramos pertence tamén ao concello de Ames) puidera ter unha orixe romana, aínda que a actual traza é medieval con orixe datada no século XIV. A súa construción foi impulsada pola mitra compostelá para conectar Santiago cos portos de Muxía e Fisterra, xa que era paso obrigado no camiño marítimo de Santiago.

• Hospital Real de Santiago

É o edificio máis significativo do momento de tránsito entre o gótico e o Renacemento en Galiza. Forma parte da rede de hospitais vertebrada en torno ao camiño para auxilio de peregrinos. Foi fundado polos Reis Católicos despois de que visitaran a cidade e comprobaran que os fieis non recibían a debida atención. Comezouse a construír no ano 1499 e concluíse nos seus elementos fundamentais no ano 1511.

• Mosteiro de Santa María de Sobrado dos Monxes

Santa María de Sobrado dos Monxes foi unha das casas máis importantes que o Císter posuíu na península, sendo probablemente a primeira en incorporarse a esta orde. Da súa construción, que se prolongou ata o século XVII, destacan especialmente a capela do Rosario, de Pedro Monteagudo, e a sancristía renacentista de Juan de Herrera, así como a sala capitular e a cociña do antigo edificio cisterciense.

• Mosteiro de San Martiño Pinario

San Martiño Pinario é un antigo mosteiro situado fronte da fachada Norte da catedral de Santiago de Compostela. A súa orixe está en relación cunha comunidade bieita establecida no lugar de Pignario, pouco despois do descubrimento dos restos do Apóstolo. No edificio obsérvase unha mestura de arte renacentista e barroca con elementos platerescos e rococós.