Patrimonio cultural galego

Situado no núcleo da parroquia de Trasalba, no concello ourensán de Amoeiro, o chamado pazo de Trasalba é un edificio construído no século XVIII. De planta rectangular pouco acusada, e con dous andares nunha das fachadas e só un na outra debido á pendente do terreo, non se trata dun pazo en sentido estrito.

O máis significativo é a súa carencia de torres e escudos nos muros de cantaría de altura regular.

Pola contra, as súas fachadas adórnanse con balcóns corridos. Na parte sur, aparece sobre columnas e linteis unha solaina desde onde se divisa un extenso panorama que remata na cordilleira que separa as provincias de Ourense e Pontevedra. Pola súa banda, na fachada norte a balconada corrida de madeira apóiase sobre arcada de medio punto e remata en galería de vidros.

Pecha o patio un portalón con lintel do ano 1764. Unha horta non demasiado extensa, na que teñen cabida un pombal de planta circular e un hórreo de tres tramos, completa as propiedades señoriais.

A día de hoxe, a casa é un Museo no que se poden contemplar obxectos persoais do escritor, mobiliario do pazo e máis a súa biblioteca, tal e como a utilizaba cando residía na construción. O propio Otero Pedrayo legou as propiedades de Trasalba -o pazo e máis os espazos anexos- a Galiza, identificada polo autor coa Editorial Galaxia.

Deste xeito, pódense contemplar directamente as pertenzas e o modo de vida do escritor, profesor, político e editor. A visita ofrece ao público o atractivo engadido de poder sentirse como un dos protagonistas de Os camiños da vida, xa que os personaxes desta novela en tres libros están intimamente unidos á vida do autor na casa señorial.