Patrimonio cultural galego

Os gravados sitúanse en tres afloramentos: o primeiro, de grandes dimensións, ofrece unha gran concentración de motivos, entre os que están presentes círculos concéntricos, cazoletas, liñas entrelazadas, un posíbel labirinto e un único zoomorfo; o segundo afloramento é de menor tamaño e ten como motivo principal un labirinto de gran beleza con cazoleta central, acompañado de pequenas combinacións de círculos concéntricos; o terceiro afloramento presenta un novo labirinto pero en peor estado de conservación. A súa adscrición cronolóxica sitúase no Neolítico e na Idade do Bronce (entre o V e o II milenio a.C.).

A relevancia desta estación rupestre proporcionoulle un extraordinario recoñecemento internacional. O máis famoso destes gravados é a Pedra do Labirinto. Poucos petróglifos galegos tiveron unha repercusión bibliográfica como a conseguida por esta pedra.

O estado de conservación é, en xeral, bo, o que permite recoñecer facilmente a inmensa maioría dos motivos gravados. Non obstante, pola súa situación nun contexto periurbano e inmediato a unha praia moi concorrida, o conxunto foi obxecto de múltiples alteracións ao longo dos últimos anos. A iso hai que lle engadir anteriores actuacións de revalorización deste conxunto, que de maneira desafortunada deseñaron a construción de plataformas pétreas e metálicas que derramaron a contorna inmediata dos gravados.

Os terreos sobre os que se localizan os petróglifos son de titularidade pública, propiedade do concello de Marín, o que facilita o seu acceso e uso público. O acceso ata o conxunto rupestre é fácil pois é posíbel chegar, incluso en automóbil, ata a mesma base do xacemento arqueolóxico grazas á sinalización direccional existente. Na actualidade estase preparando unha infraestrutura expositiva e interpretativa do sitio e dos gravados que facilite a súa comprensión.